Д-р Биљана Мирчевска-Бошева е редовен професор на Катедрата за сла-вистика при Филолошкиот факултет „Блаже Конески“ на Универзитетот „Св. Кирил и Методиј“ во Скопје.
Дипломирала на Филолошкиот факултет „Блаже Конески“ во Скопје на групата за руски јазик и книжевност во 2002 година и на групата за македонска книжевност и јужнословенски книжевности во 2005 година. Нејзините научни интереси се насочени пред сè кон фразеологијата на словенските јазици, па на оваа тема ги посветила и магистерската и докторската дисертација: Фраземи со значење време во македонскиот и во рускиот јазик, одбранета во 2008 година, и Фразеосемантичкото поле чувства и емоции во рускиот и во македонскиот јазик во 2012 година.
Во периодот 2003 до 2008 година работи како асистент-истражувач во Одделението за лингвистика и литературна наука при Македонската академија на науките и уметностите. На Филолошкиот факултет „Блаже Конески“ работно е ангажирана од 2003 година, кога започнува како демонстратор, а подоцна напредува во звањата помлад асистент, асистент, доцент, вонреден и редовен професор. Предава предмети од областа на граматиката на рускиот јазик, словенската фразеологија и споредбената анализа на рускиот и на македонскиот јазик. Како поканет професор одржувала предавања на Московскиот државен универзитет „М.В. Ломоносов“, како и на универзи-тетите во Гдањск, Братислава и Марибор.
Автор е на две монографии и на околу 100 научни трудови објавени во Македонија, Русија, Чешка, Словачка, Австрија, Србија, Хрватска, Унгарија, Словенија. Учествувала на повеќе од шеесет научни конференции и како истражувач е вклучена во многубројни национални и меѓународни научни проекти.
Од 2015 до 2020 година е раководител на Катедрата за славистика, а од 2020 година – директор на Рускиот центар при Универзитетот „Св. Кирил и Методиј“ во Скопје.
Член е на редакциските одбори на списанијата Вестник МГУ. Серия Филология (Русија), Евразийский гуманитарный журнал (Русија), Русский тест (Русија), Славистика (Србија) и Славистички студии (Македонија). Од 2018 година член е на Меѓународната комисија за фразеологија при Меѓународниот славистички комитет.
Проф. Мирчевска-Бошева е претседател и член на организациски одбори на меѓународни конференции, координатор на обуки за наставници и активно учествува во промоцијата на словенските јазици и култури.