• Давор Јанкулоски е роден во 1991 г. во Скопје. Основното и средното образование ги завршува во Кичево. Во 2010 г. се запишува на Филолошкиот факултет „Блаже Конески“ во Скопје, каде што дипломира во 2014 г., магистрира во 2018 г., а во 2024 г. на истиот факултет го одбрани докторскиот труд „Конструкциите со има и н/т партицип во дијалектниот и во современиот македонски јазик“.
  • Од 2018 г. работи во Истражувачкиот центар за ареална лингвистика „Божидар Видоески“ при МАНУ. Активно е вклучен во повеќе проекти во рамките на Академијата, меѓу кои: Меѓународни лингвистички атласи, Развојниот пат на македонскиот граматички систем (во балкански контекст), Местото на македонскиот јазик во словенскиот и балканскиот јазичен свет. Во периодот 2019–2021 г., учествува во проектот Критичко издание на целокупното творештво на Блаже Конески, каде што е ангажиран при подготовката на осмиот том „Дијалектолошки, балканистички и ономастички прилози“. Во рамките на билатералната соработка помеѓу МАНУ и САНУ, бил вклучен и во проектот Јазикот како запис на културата во етнолошката и лингвистичката анализа на релација Србија – Македонија, а на меѓународен план, учествувал и во проектите: Declining Case: Inflectional Loss in Progress на Универзитетот Сари, Велика Британија, во периодот 2021–2024 г., и Formal аnd Functional Analysis оf Periphrastic Verbal Constructions in Dialect and Standard Macedonian (in a Balkan Setting), којшто се одвивал во рамки на соработката на Истражувачкиот центар за ареална лингвистика при МАНУ и Словенско-евроазискиот центар при Универзитетот Хокаидo, Јапонија, во 2024 г.
  • Неговата библиографија од 2018 г. до денес брои 50 објавени позиции. Своите трудови, Јанкулоски ги објавува во македонскиот научен печат, како и во странски зборници и списанија, а тие главно се од областа на македонската дијалектологија и ономастика, глаголскиот систем на македонскиот јазик, етимологијата, како и анализата на процесите на семантичка мотивација и семантичка деривација во македонскиот јазик. Од 2015 г. до денес активно учествува на научни конференции во земјата, но и во странствo – Полска, Чешка, Украина, Словенија итн. Во периодот октомври – ноември 2024 г., одржал две предавања во Јапонија, на Универзитетот Хокаидо и на Универзитетот во Токио, а покрај предавањата го промовирал и „Лингвистичкиот атлас на македонските дијалекти (според материјалите на ОЛА)“, објавен во МАНУ во 2020 г. Добитник е на државната награда „Гоце Делчев“ за 2025 г., како дел од авторскиот колектив на научното дело „Македонски дијалектен атлас (од ризницата на картотеката – лексички материјали)“. Член е на Македонскиот славистички комитет и на Македонската национална комисија на Општословенскиот лингвистички атлас при Меѓународниот славистички комитет.