Топономастички студии за Кичевскиот регион

Оваа монографија претставува избор на текстови посветени на проучувањето на топонимијата на една географска област во западниот дел на Македонија – Кичевскиот Регион. Градот Кичево, централната населба во регионот, е сместен во средишниот дел на Кичевската Котлина, која претставува јасно обликувана природна целина, опколена од сите страни со високи планини. Ваквата географска поставеност, како и богатото културно-историско наследство на регионот, придонеле за создавање разновиден и повеќеслоен топонимиски фонд, во којшто, покрај природните карактеристики на просторот, се одразиле и бројни општествени и културни процеси што се одвивале низ различни историски периоди. Имињата на местата – топонимите – како јазични сведоштва за минатото, често зачувуваат архаични форми и значења, чие толкување не секогаш е едноставно и бара посебен научен пристап и објаснување.